సంబరాల విశేషాలు:

• I. సంబరాల ముందు రోజు అనగా గురు వారము:

  ఈ రోజు ఉదయము నుండి చెరువు నుంచి 101 బిందెలు నీళ్ళతో (పాలాభిషేకముతో) శ్రీ వీరమ్మ తల్లి గద్దె మరియు గుడి శుభ్రము చేయుట (మ్రొక్కు కున్న వారు కూడా) మరియు 101 బిందెలతో మామిడికోళ్ళ గ్రామమున వెలసి ఉన్న గ్రామ దేవత గంగానమ్మ తల్లి తలంటు స్నానము చేయుంచుట జరుగును. శ్రీ వీరమ్మ తల్లి గద్దె అలంకరించుట మరియు ఆ వారం నందు గుడి బయట తాటాకు పందిరి గ్రామ వాసులచే వేయడం మొదలగు పనులు జరుగును.

• II. సంబరం రోజున అనగా శుక్ర వారము:

  గ్రామ పెద్దల సమాచారం ప్రకారం, ఈ రోజు ఉదయం, అమ్మ వారికి, దేవుడు భద్రయ్య గారి వారసులు, డప్పులు, మేళాలతో తల్లికి, పసుపు రాసి, కుంకుమ బొట్లు పెట్టి, దీపారాధన చేసి, నైవేద్యం పెట్టి, పూలాలంకరణ చేయుదురు. దేవుడు భద్రయ్య గారి ఇంటి నుండి పాలకావడి, చిలకలు, గాజులు, పసుపు, కుంకుమ, చీరలు తీసుకుని వచ్చుదురు.
  
  ఈ సంబరం రోజు అమ్మ వారు చెరువు రేవు లో స్నానం చేస్తూ ఓలలాడునపుడు, గుడిసె వారు మగ్గులతో నీళ్ళు పోసెదరు. తడి బట్టలతో అమ్మ వారికి పారాయణం చేసి, బొట్టులు పెట్టి, కాళ్ళకు గజ్జెలు కట్టి, చిలకలు (తల్లికి ప్రీతికరమయిన తీపి) ఎగురవేసి, పుట్టినింటి కి పోతు రాజు తో వచ్చును. వచ్చునపుడు, కాళ్ళు క్రింద పెట్టకుండా, చలువ బట్టలు వేసి తీసుకుని వచ్చుదురు. వచ్చునపుడు దారి నందు కోడి ని సుమారుగా ఊరి మేడ ముందు చూపెట్టి తీసుకుని వచ్చుదురు.
  
  పుట్టినింటి వారు, కాళ్ళు కడిగి, ఒడి బియ్యం కట్టి, చీర, జాకెట్ పెట్టి, బొట్టు పెట్టి , గాజులు తొడిగి, ఇంటిల్లి పాది దణ్ణం పెట్టుకుని (తల్లి, మమ్ములను, ఊరి ప్రజలను సుఖము గా చూడుమనీ, ఆశీర్వదించమని కోరి అమ్మ వారిని పంపుదురు ) సారె, పానకము, పాలు, తల్లికి ఇష్టమయిన చిలకలు (తీపి) కావడి తో పుట్టినింటి వంశస్తులు మరియు లంకాదొడ్డి గుడిసె వారు అందరూ అమ్మ వారితో గద్దె వరకు చలువ బట్టలు మీద నడుచుకుంటూ వచ్చి, అన్నియు ఇచ్చి కూర్చుండ బెట్టి కొబ్బరికాయ కొట్టి, సాంబ్రాణి వేసి, చిలకలు ఎగురవేసి, దణ్ణం పెట్టుకుంటారు. గద్దె దగ్గరకు వచ్చునపుడు, గంగానమ్మ తల్లి కి దణ్ణం పెట్టి, పోతు రాజు కు కొబ్బరి కాయ కొట్టుదురు. మరియు గద్దె నందు ప్రవేశించు సమయము నందు, నల్ల కోడి ని చూపెట్టి, చాకలి వానితో, దిష్టి తీసి లోపలికి వచ్చుదురు. ఆ తరువాత భక్తులు అందరూ దేవతను దర్శించుకుందురు. పుట్టినింటి వారు చేయు ఈ కార్యక్రమములు వీక్షించుటకు క్రింది వెబ్ సైటు ను చూడండి.
  

  https://youtu.be/juGJKwCqgXw?si=0FmSv0TGcne1_9ld

  https://www.youtube.com/watch?v=ueu_JI-1x00&t=1s

  https://www.youtube.com/watch?v=kwkUoZEy7iI

  
  ఆ రోజు సాయంత్రం, పోతు రాజు మరియు పంబళ వారు, చాకలి తో ముంత, ప్రమీదలు, మంచి నూనే, సాంబ్రాణి, దద్దోజనం, పరమాన్నం అన్నియును కావడి తో చాకలి తీసుకుని ఊరి బయట జమ్మి చెట్టు దగ్గరకు వెళ్ళి, అన్నియును తెల్లటి వస్త్రము నందు పెట్టి, జమ్మి చెట్టు చుట్టూ కట్టి, దీపారాధన పంబళ వారు చేయుదురు. కాసేపటి తరువాత, అందరూ వెళ్ళి, పంబళ వారు చెప్పే కధ విని, ప్రసాదములు తీసుకుని గుడికి వచ్చుదురు. ఈ కార్యక్రమములు వీక్షించుటకు క్రింది వెబ్ సైటు ను చూడండి.
  

  https://www.youtube.com/watch?v=6k2dt-Xo7Ow

  ఆ రాత్రి, అన్నదానము నందు భోజనాలు అయిన తరువాత, 10 గం లకు, పుట్టి నింటి వారి స్థలము నుండి (ఈ రోజుల్లో ఎవరి ఇళ్ల నుండి వారి యొక్క) ఎడ్ల బండ్ల పై ప్రభ లు కట్టి (ఈ రోజుల్లో ట్రాక్టర్లు) దేదీప్యమయిన లైట్ లతో మరియు ఇష్టమయిన దేవుడి ప్రభ లతో అలంకరించ బడి, దేవుడు భద్రయ్య గారు (ఇప్పుడు పోతు రాజు కానీ దేవుడు భద్రయ్య గారి వారసులు కానీ) వచ్చి దేవుడి గారి బండి ముందు కొబ్బరి కాయ కొట్టి, అగరవత్తులు వెలిగించి, సాంబ్రాణి చల్లి, తల్లికి దణ్ణం పెట్టుకుని, పంబళ వారు నిమ్మ కాయ తీసిన తరువాత మొదటగా దేవుడు గారి బండి, బండి మీద దేవుడు భద్రయ్య గారు, తరువాత పుట్టినింటి వారి బళ్ళు, తరువాత ఊరి వారి బళ్ళ తో, ఊరేగింపు బయలు దేరును.
  

  https://www.youtube.com/watch?v=uI_wSLE9i7c

  https://www.youtube.com/watch?v=C8AbDZ_PUGY&t=170s

  ఊరేగింపు నందు, డప్పుల వారితో, కోలాటం చేయు వారితో, మైక్ సెట్టింగ్స్ తో కోలాహలంగా బయలుదేరి, గద్దె దగ్గరకు వచ్చును. దేవుడు భద్రయ్య గారు ఈ రోజు చీర కట్టుకుని, గద్దె నుండి అమ్మ వారి ఫోటో ను, తీసుకుని, బయటకు వస్తూ, గద్దె నందు తెచ్చి పెట్టుకున్న కర్రలు అందరకి ఇస్తూ వచ్చి, మొదటి బండి ఎక్కిన తరువాత, గద్దె నుండి బయలుదేరి, ఊరి చుట్టూ, ప్రతి వీధి తిరుగును. లంకాదొడ్డి గ్రామము గుడిసె వారి ఇంటినుండి ప్రభ రామాలయం, గంగానమ్మ గుడి మీదుగా ఊరి అంతయు తిరిగి మామిడికోళ్ళ ప్రభ బళ్లతో కలిసి, తిరుగును. ప్రతి ఇంటి దగ్గర ఆగి, ఆ ఇంటి వారు, కొబ్బరి కాయ కొట్టి, అగరవత్తులు వెలిగించి, పసుపు, కుంకుమ, వేపాకులు కలిపిన నీళ్ళు దేవుడు బండి ముందు వార పోసి, తల్లికి దణ్ణం పెట్టుకుందురు.
  

  https://www.youtube.com/watch?v=L44cmAjQDOA

  https://www.youtube.com/watch?v=b98bucu7Oho

• III. సంబరం మరుసటి రోజు అనగా శని వారము:

  ఉదయాన, శ్రీ వీరమ్మ తల్లి కి, దేవుడు భద్రయ్య గారి ఇంటి నుండి విజయవాడ తిరుమలశెట్టి వారు పాలకావడి, పసుపు, కుంకుమ, మొదలగునవి తీసుకుని గద్దె దగ్గరకు వచ్చును.
  పాళీ లు కట్టి న తరువాత, పంబళ వారు, తల్లి యొక్క కధ చెప్పుదురు. ఈ కధ చెపుతుండగా, గుడిసె వారు పసుపు, కుంకుమలతో ఓలలాడడం, దీపారాధన చేసి, పాలు పొంగించి, పాళీల దగ్గర పెట్టుదురు.
  ఊరి వారందరూ, వారి యొక్క పశువులను గుడి కి తీసుకుని వచ్చి, దేవుడు భద్రయ్య గారితో, మంత్రించిన బండారి ని వాటి మీద చల్లే వారు.
  
  శ్రీ దేవుడు భద్రయ్య గారు ఉన్న రోజులలో, ఆయన స్వయముగా ఒక పోతును పెంచి, ఈ శని వారము రోజున అమ్మ వారికి బలి ఇచ్చి, దానిని ఊరి ప్రజలకందరికి ఇంటింటికీ పంపే వారు. పుట్టినింటి వారికి, యార్ల వారికి మాత్రం, వారి ఇంట్లో భోజనాలు వుండేవి. ఆయన తరువాత, ఊరి వారు, విరాళములు సేకరించి, పోతులను కొని, పంచుకుని, వండుకొని అమ్మ వారి ప్రసాదం గా భుజింతురు.

• • మామిడికోళ్ళ మరియు లంకాదొడ్డి గ్రామములను కలరా లాంటి వ్యాధులు రాకుండా, దేవుడు భద్రయ్య గారు నిష్ట గా శ్రీ వీరమ్మ తల్లి ని కొలువుట (వేపాకు నెల పదిహేను రోజులు భుజించి)
• • ప్రతి శుక్ర, శని వారములలో దేవుడు భద్రయ్య గారు శ్రీ వీరమ్మ తల్లి సందర్శనానికి వచ్చు భక్తులకు సఖినము ఉదయము 7 గం నుండి రాత్రి 8 గం వరకు ఏమియు తినకుండా (మజ్జిగ తీసుకుని) చెప్పుట. ప్రతి 30 మందిని కూటమి గా చేసి, గద్దె నందు సఖినం చెప్పే వారు.
• • భక్తులు ఏది అయినను అనుకుని, పని జరిగిన తరువాత మ్రొక్కులు తీర్చుకుందురు.
• • శుభకార్యముల ముందు, (ఇల్లు కట్టుకొనుట, పెళ్ళిళ్ళు జరుగుట) వచ్చి అమ్మ వారికి దణ్ణం పెట్టుకోవడం.
• • చిన్న పిల్లల 21 రోజుల వుయ్యాల, 6 వ నెల 6 వ రోజు అన్న ప్రాసన గుడి నందు భక్తులు వచ్చి జరుపుకుందురు.
• • ఓణీ, పంచె, పెళ్లిళ్లు, సత్యనారాయణస్వామి నోములు, రిసెప్షన్స్, పుట్టినరోజు మొదలగునవి శుభకార్యములు గద్దె దగ్గర జరుపుకొనుట
• • పిల్లలు పుట్టని వారికి సంతాన ప్రాప్తి అయిన తరువాత పేరు కూడా వీర లేక వెంకట తో పెట్టుకుందురు.
• • ఎవరైనను, క్రొత్తగా వివాహం చేసుకొన్న వారు, లేక క్రొత్తగా మంగళ సూత్రములు చేయుంచు కున్నవారు, వారి మంగళ సూత్రములు తీసి, ఆయన మెడలో వేసినపుడు, సఖినం అయిన తరువాత, ఎవరిది వారికి అప్ప జెప్పేవారు (తారు మారు అవకుండా).
• • క్రొత్తగా ఏదైనా వాహనములు (లారీలు, ట్రాక్టర్లు, స్కూటీ లు, బైక్ లు, కార్ మొదలగునవి) కొన్నపుడు, వారు గద్దె దగ్గరకు తీసుకుని వచ్చి, పూజలు చేయించుకుని, బండారు చల్లించుకుందురు. మరియు వారి కోరికలు తీరినచో సంబరము రోజున ఊరంతయు ప్రభ బళ్ళతో పాటు తిప్పుదురు.
• • భక్తులు శ్రీ వీరమ్మ తల్లి పై నమ్మకము తో వివిధ కారణములతో (ఆర్ధికము, ఆరోగ్య, సంరక్షణ మరియు ఏదైనా కుటుంబ సమస్యలు) తల్లిని దర్శించుకుని, ఆ యొక్క భాదలు తీర్చమనీ వేడుకుందురు.
• • శ్రీ వీరమ్మ తల్లి దేవత గా చాలా శక్తి కలిగి వుండి, ఆ తల్లి భక్తులను వారి దురదృష్టముల నుండి, దుష్టశక్తుల నుండి సదా కాపాడును.
• • భక్తులు, వారికి గాని, వారి పిల్లలు, కుటుంబం లో వారికి గాని ఏదైనా అంటు వ్యాధులు (పొంగు, మసూచీకము, అలెర్జీ లు) వచ్చినపుడు, తల్లిని దర్శించుకొనుట లేక ఊరివారందరు అనుకోని మ్రొక్కుకుని ముడుపులు కట్టుట జరుగును.
• • తల్లి గ్రామ దేవతగా ఊరిని తుఫానులు రావడం వలన జరుగు నస్టములు లేకుండా, సమయానికి వర్షము వచ్చి పంటలు బాగా పండడం, వ్యాధులు రాకుండా కాపాడుట (కరొన సమయమున, మామిడికోళ్ళ గ్రామమున ఎవరు ఈ వ్యాధి వలన చనిపోలేదు) చేయును.
• • పిల్లలకు పుట్టు వెంట్రుకలు తీయుట, అన్నప్రాసన పెట్టుట, అక్షరాభ్యాసం చేయుంచుట మొదలగునవి.
• • పంట ఏదైనను (ధాన్యం, మినుములు మొదలగునవి), మొదటి బస్తా లేక కొంత అమ్మవారికి సమర్పించుకుందురు. మరియు గేదెలు, ఆవులు ఈనినపుడు, మొదటి పాలు అమ్మ వారికి ఇచ్చుదురు.
• • విదేశీయానము చేయ దలచిన వారు, తల్లి దగ్గరకు వచ్చి, వారి వీసాల గురించి మ్రొక్కుకొనుట.
• • అయ్యప్ప భక్తులు శబరిమలై వెళ్ళు ముందు, తిరుపతి వెళ్ళునపుడు, ఒకసారి తల్లి ని దర్శించుకుని వెళ్ళుట.

దేవుడు భద్రయ్య గారి వంశస్థులు రోజు క్రమం తప్పకుండా

• • శ్రీ వీరమ్మ తల్లి కి దూప, దీప, నైవేద్ధ్యం పెట్టుట.
• • బయట ఊరి భక్తులు వచ్చిన యెడల వారికి ఆహ్వానించి, వారు చేయు పూజ కార్యక్రములకు (పాలు పొంగించుకొనుట, పాల పొంగుళ్ళు చేయుట, కొబ్బరి కాయ కొట్టుట, పసుపు, కుంకుమ పెట్టుట, కోడి, మేక, పొట్టేలు ను బలి యిచ్చుట మొదలగునవి, ఎవరు అనుకొన్నవి వారు చేయుదురు) తోడ్పాటు
• • పొయ్యి, గ్యాస్, వంట పాత్రలు, కుర్చీలు మొదలగునవి సమకూర్చుట
• • శ్రీ వీరమ్మ తల్లి బండారి, తాళ్ళు ఇవ్వడం

వూరి పొలిమేర సమాచారము:

సమాచారం ఇచ్చినవారు

యూట్యూబ్ లింకు: